【名將之後】古華特之子為阿積士上演帽子戲法,阿爸都未試過!

來源: fanpiece
2017-11-27 09:06
Lights
球壇都有唔少名宿嘅仔仔踢波,但向來冇乜幾多個真係可以憑實力「踢出我天地」。荷蘭名將古華特 (Patrick Kluivert) 個仔祖斯甸古華特 (Justin Kluivert) 唔知有冇呢個機會呢?小弟就話,睇佢個勢應該大有作為。

今年18歲嘅祖斯甸古華特,跟隨爸爸嘅腳步,自細就喺阿積士青年軍踢波,直到上季喺1月第一次代表阿積士一隊喺聯賽上陣。Justin仔個樣同阿爸成個餅印咁款,踢嘅位置就唔同,阿仔主要係踼翼鋒嘅,佢喺上一季荷甲上陣14場,其中有7次係後備上陣,總共幫球隊攻入兩球。


Justin仔今季似乎更加接近主力位置,因為今季荷甲13輪比賽,佢已經有6次正選同3次後備上陣機會,當然仲要繼續努力爭取機會啦,不過相信好快會上位,因為佢喺啱啱嗰場荷甲比賽光芒四射,仲完成咗一樣阿爸都未試過嘅成就。

喺第13輪荷甲,阿積士主場對洛達,祖斯甸古華特正選上陣,今季仲未有入波嘅佢,「一係唔發威,一威就要龍咁威」,一口氣射入三球,仲幫球隊反勝。

喺45分鐘,阿積士本來落後0-1,祖斯甸古華特喺左路同隊友薛耶治配合,以速度推入禁區,右腳射遠柱入網,射成1-1,幫球隊扳平。


去到60分鐘,佢個人表演,左路推大位遠射,龍門得個睇字。


85分鐘,法蘭基迪莊後場長傳直接俾到左翼嘅祖斯甸古華特,佢一兩下插花拐入大位,再次熨遠柱地波入網。加上,中間有多爾貝治同雲達碧克梅花間竹嘅入波,阿積士今場以5-1大勝洛達,另外法蘭基迪莊都十分搶鏡,佢今場貢獻咗3個助攻。


Justin仔右腳打左翼,三球都係類似嘅招數,但對手早知係咁都係mark佢唔住,可見佢呢招已經相當純熟,而且佢射術的確精湛,唔知有冇接受過阿爸特訓呢?不過佢有一樣嘢就超越咗阿爸喇,阿爸雖然幫阿積士入過39球,兼且曾經係荷蘭國家隊歷史神射手,但就未試過喺荷甲上演帽子戲法,都算青出於藍啦,荷蘭未來靠你喇仔!






全場精華




順帶一提,古華特9歲嘅細仔Shane Kluivert,都可能係明日之星,因為佢人仔細細今年7月就已經俾Nike睇中,簽咗5年贊助合約,依家仲踢緊巴塞青年軍。




Source: ESPNSportbible